తప్పిపోయిన కుమారుడు

యేసుక్రీస్తు తన శిష్యులకు బోధించిన అనేక ఉపమానాల్లో తప్పిపోయిన కుమారుడు (prodigal son) కూడా ఒకటి. లూకా సువార్త 15 వ అధ్యాయంలో ఈ కధ మనకు కనిపిస్తుంది. క్రైస్తవులకే కాక ఇతరులకు కూడా బాగా చిరపరిచితమైన కధ ఇది. ఎంతో గొప్ప లోతైన మర్మములు కలిగిన కధ. చెడిపోయిన బిడ్డలను తండ్రి తప్పక చేరదీసి క్షమించి ఆదరిస్తాడనే గొప్ప నమ్మకాన్ని ఈ కధ ద్వారా యేసయ్య మనకు వివరిస్తాడు. మనం ఎంతటి ఘోర పాపులమైనా.. అన్నీ కోల్పోయినా చివరకు నా అన్నవారే చీదరించినా తప్పక ఆ యేసయ్య మనల్ని ఆదరిస్తాడు, అక్కున చేర్చుకుంటాడు.

నేడు ఎంతోమంది నా అనేవాళ్ళు లేక, ఆదరించే వారు కానరాక, దారి తప్పి, అనాధలుగా జీవిస్తున్నారు, ఆకలితో అలమటిస్తున్నారు. ఎంతో గొప్పగా మలుచుకోవలసిన అందమైన భవిష్యత్తును చేజేతులా నాశనం చేసుకుంటున్నారు. నేటికైనా వారు తమ జీవితమేమిటో, తమ ప్రయాణం ఎటువైపుగా సాగిపోతుందో గ్రహించాలి, గమ్యంలేని తమ బ్రతుకులకు నిజమైన గమ్యం యేసే అని గ్రహించగలగాలి. అలా గ్రహించగలిగిన నాడు వారు మన కధలోని తప్పిపోయిన కుమారుని లాగే తన తండ్రి ఇంటికి తిరిగి వస్తారు. జీవితాన్ని తిరిగి కాంతిమయం చేసుకుంటారు.

తప్పిపోయిన కుమారుని కోసం ఆ తండ్రి చేతులు చాచి ఏవిధంగా ఐతే ఎదురుచూస్తున్నాడో అలాగే మన తండ్రి ఐన యేసయ్య కూడా నీ కొరకు నాకొరకు చేతులు చాచి ఎదురుచుస్తూనే ఉన్నాడు. ఎప్పటికైనా వాస్తవాల్ని గ్రహించి, సాతాను చెరను, ఆ సంకెళ్ళనూ విడిపించుకుని తన సన్నిధికి వస్తావని ఎదురుచూస్తూనే ఉన్నాడు. గొప్ప విందును చేయడానికి సిద్దపడి ఆశగా నీవైపు చూస్తున్నాడు.

సహోదరుడా.. గ్రహించు.. మన బంగారు భవిష్యత్తు చీకటికూపాల్లో పడి ఆరిపోకూడదు, నిత్యనరకాగ్నిలో పడి మాడి మసి అవ్వకూడదు. ఆలోచించండి. మన జీవిత ప్రయాణం ఎటువైపు ?
 సాతను చీకటి ప్రపంచం వైపా..? లేక నాడు నీకొరకు నా కొరకు సిలువపై ప్రాణాలొడ్డిన మన తండ్రివైపా..? ఆలోచించు, రక్షణ మార్గం అనుసరించు, యేసులో తిరిగి జన్మించు. ఆమేన్.

Watch and subscribe 

తప్పిపోయిన కుమారుడు - Prodigal Son

మరియనే దేవుడు ఎందుకు ఎన్నుకున్నాడు? ఆమెకున్న అర్హతలేంటి?? మీకు తెలుసా???...

మరియనే దేవుడు ఎందుకు ఎన్నుకున్నాడు? 
ఆమెకున్న అర్హతలేంటి?? మీకు తెలుసా???

మరియ, దేవునిచే ఎన్నుకోబడిన స్త్రీ,

పరిశుద్ధ గ్రంధంలో ఎవరికీ లభించని గొప్ప స్థానం మరియకు లభించింది, స్త్రీలలో ఆమె ఆశీర్వదించబడినది, దేవునిచే ఎన్నుకోబడినది, దేవుని కృపకు పాత్రురాలు అయ్యింది, ఎంతగా ఆశీర్వదించబడటానికి మరియలో ఉన్న అర్హతలు ఏంటి? పెండ్లికాని స్త్రీ గర్భవతి అయితే వారిపట్ల సమాజం చూసే చిన్న చూపు, కుటుంబ పరువు మర్యాదలు, ఆనాటి యూదుల కఠిన సాంప్రదాయాలు, శిక్షలు... ఇవేవి ఆనాడు మరియ ఆలోచించలేదు, కేవలం పరమతండ్రి అయిన ఆ దేవదేవుని ఆజ్ఞకు బద్దురాలై రాజాధిరాజుకు జన్మనిచ్చింది. తల్లిగా ఆమెలో విభిన్న కోణాలను మనం చూడవచ్చు. సిలువ మ్రానుపై వేలాడుతూ సర్వోన్నతుడు, పదివేలమందిలో అతిసుందరుడు ఐన తన బిడ్డ దేహమంతా గాయాలై, రక్తమోడుతూ చిత్రహింసలు అనుభవించి ప్రాణాలు విడిచినా.. ఆ భయంకరమైన వేధనను మౌనంగా భరించింది.లోక పాప పరిహారార్ధం తన బిడ్డ శిలువ మ్రానుపై మరణవేదన అనుభవిస్తూ కూడా దేవుని ఆజ్ఞకు లోబడి నడుచుకుంది. దేవుని యెడల తన భాద్యతను గుర్తెరిగినదై మేడగదిలో యేసు శిష్యులతో కలిసి దేవుని ప్రార్ధించింది, స్తుతించింది. ఎంత గొప్ప స్త్రీ మరియ, అందుకే దేవుడు ఆమెను ఎన్నుకొన్నది. అందుకే ఆమె అంతగా ఆశీర్వదించబడిన స్త్రీ అయినది. అమేన్.